CEBU, Philippines — Gitapos sa Kapitolyo ang usa ka bulan nga selebrasyon niini sa ika-455 nga Kasumaran sa Probinsiya sa Sugbo pinaagi sa “Gabii sa Pasalamat” nga kalihokan diha sa Capitol Social Hall niadtong Agosto 31 uban ang stakeholders nga adunay natampo sa kalamposan sa nagkadaiyang kalihokan nga gihimo sa probinsiya tibuok bulan sa Agosto.
Sa iyang mensahe, si Gobernador Gwendolyn Garcia nagkanayon nga nahimong malamposon ang mga kalihokan sa probinsiya sa pagselebrar sa kasumaran niini tungod sa paghiniusa sa mga lider sa Sugbo lakip na sa mga pribadong organisasyon hilabina sa mga highlight sa selebrasyon sama sa 1Cebu Expo, Health, Tourism, and Business Summit nga gitambongan sa mga delegado gikan sa nasud sa Russia ug ang Pasigarbo sa Sugbo 2024.
Ang lokal nga kagamhanan sa Dakbayan sa Sugbo gihatagan og P3 milyones sa probinsiya isip token of appreciation sa pagsuporta niini ilabi na sa pagpahigayon sa Pasigarbo sa Sugbo diin dili lang ang Cebu City Sports Center (CCSC) ang gipagamit aduna pay mga personahe ug opisyales sa siyudad ang gi-deploy aron motabang sa kahapsay ug kalinaw sa maong festival niadtong Agosto 25.
Gawas sa Dakbayan sa Sugbo, apil usab sa gihatagan og plaque of appreciation ang mga mayor sa 51 ka lungsod ug siyudad sa probinsya nga nipadala og contingent alang sa Pasigarbo.
Gipasalamatan usab ang ubang ahensiya sama sa Philippine National Police (PNP), Department of Education, Land Transportation Office, Land Transportation Franchising and Regulatory Board, FT Joint Task Group Cebu, Philippine Navy, Philippine Coast Guard ug Bureau of Fire Protection.
Ang utility firms, telecommunication nga kompaniya ug ubang pribadong grupo nga nitampo sa kalamposan sa Pasigarbo ang gihatagan og pag-ila sa Kapitolyo. — /BDB (BANAT NEWS)