“Lost Lake” tinguha nga mabalik sa dakbayan sa Sugbo Iris Mascardo

CEBU, Philippines — Gipaningkamotan karon sa Task Force Gubat sa Baha (TfsGB) sa Cebu City nga mabawi ang contour sa giingong “Lost Lake” sa dakbayan nga gituohang natural rain catchment basin nga makatabang sa pag menus sa baha ilabi na sa Bonifacio Street.

Si Charles Villagonzalo, Chief of Operations sa TFsGB niingon nga kining gituohang linaw karon gi ukopahan na sa mga informal settlers ug pipila ka mga establisamento.

Gipakita ni Villagonzalo sa The Freeman ang mapa sa Estero de Parian, ang pinakamubo sa walo ka suba sa dakbayan sa Sugbo, diin adunay mga sapa nga konektado niini; ang usa padulong sa 138 Mall, ug ang usa sa Zulueta Bridge.

Matud niya, usa ka mapa sa Spanish time ang nagpakita sa porma sa gituohang “Lost Lake” sa dakbayan sa Sugbo diin dugang pa niya, konektado sa Zulueta Bridge. Gihulagway ni Villagonzalo nga kini “potato shape”. Segun sa ilang pagtuon, ang giingong linaw sa maong dapit nagsugod sa pagkipot niadtong 1900s ug sa kadugayan nawala.

Matud pa ni Villagonzalo, ang maong contour o ang outer-line sa lake, gimarkahan og blue nga nagpasabot nga wala pa kini ma-claim ug gipanag-iya pa sa City Government. Gitataw niya nga walay property number ang maong lugar nga nagpasabot nga way tag-iya niini sanglit lake kini kaniadto.

Sa ilang pagbisita sa maong lugar, gibana-bana sa mga residente nga mokabat sa 20 metros ang gilapdon sa contour, diin sa Villagonzalo miingon nga igo ra ang gilapdon nga kasudlan og barko. Gipasabot ni Villagonzalo nga kung kini nga linaw mabawi; makatabang kini sa pag menus sa baha sa palibot sa siyudad. Sa pagkakaron, matud niya nga lakip sa labing dakong hagit mao ang T. Padilla nga walay exit ang outflow. Sa pagkakaron, si Villagonzalo miingon nga ang pagbawi sa contour gikatakda nga maapil sa ilang mga tinguha alang sa Phase 2 aron maminusan ang pagbaha sa siyudad. Ang Phase 1 niini naglangkob sa paghawan sa three-meter easement sa Estero de Parian nga nagpadayon karon. — /MEL (BANAT NEWS)