CEBU, Philippines — Patay ang gipasanginlang hitman human kini gikatahong nakigpinusilay sa kapulisan nga miresponde sa alarma nga dunay armadong tawo diha sa Barangay Taloot, Lungsod sa Argao kagahapon sa alas 6 sa buntag.
Ang suspetsado mao si Danilo Gula Rafaela, 43, residente sa maong barangay. Matud pa sa kapolisan sa Argao ex-convict kini gumikan sa kasong murder ug giingong usa sab kini ka hitman.
Sa impormasyon sa Argao Police Station nga alas 6 sa buntag kagahapon nakadawat sila og tawag gikan sa concerned citizen nga nisumbong nga ang suspetsado nagbuto sa iyahang armas duol sa panimalay niini sa maong barangay.
Ang intelligence personnel sa Argao Police Station uban ilang hepe nga si Police Major Janus Giangan niresponde sa maong taho.
Sa pag-abot sa kapulisan sa dapit giingong nasigpatan dayun nila ang suspetsado nga nagdala og mubo kalibre sa armas. Gikompronta dayon siya sa kapulisan.
Apan inay motahan giingong mipabuto kini sa iyahang armas ngadto sa mga polis hinungdan nga gibawsan kini agi og depensa sa ilang kaugalingon.
Gikataho nga atol sa sinukliay og bala nakahigayon kini sa pag-ikyas pinaagi sa pagdagan padung sa bakilid nga dunay kalibonan.
Sumala pa sa kapolisan samtang nagdagan sa bakilid nagsige sab kini og pusil sa mga polis hangtud nga kini naigo sa usa sa mga polis ug nakabsan kini sa kinabuhi.
Gitabang pa ang suspetsado sa medical team apan gideklarar nining dead on the spot.
Na-recover sa kapulisan gikan sa suspetsado ang mga ebidensya usa ka kalibre .45 nga armas nga aduna nalay duha ka bala sa magazine niini. -- IBM BANAT NEWS