Garcia nihangyo nga ipabiling P888 ang pelete sa eroplano sa Bantayan

CEBU, Philippines — Gihangyo ni Gobernador Gwendolyn Garcia ang operator sa King Aces Travel and Tours nga ipabilin lang nga tag P888 ang plete o ticket sa eroplano padulong ug gikan sa Bantayan Island.

Kagahapon gipahigayon ang inaugural o unang commercial flight gikan sa Mactan Cebu International Airport (MCIA) padulong sa Bantayan Island Airport sa Lungsod sa Santa Fe, Isla sa Bantayan.

Ang RP-C 9962, usa ka 72-seater ATR twin-engine turboprop aircraft sa King Aces Travel and Tours maoy nagkarga sa mga pasahero padulong sa maong isla diin nibiya kini sa MCIA alas 8:08 sa buntag ug niabot sa Bantayan Airport mga alas 8:36 sa buntag.

Sakay sa maong eroplano ang pipila ka mga turista ug opisyales sa Sugbo diin pag-abot sa tugpahanan sa isla gipahigayon dayon ang usa ka programa.

Ang maong commercial flight molanat lang sa 25 minutos kompara sa biyahe sa bus ug barko gikan sa Dakbayan sa Sugbo nga molanat ngadto sa unom ka oras.

Si Garcia nagkanayon nga dako ang matabang sa maong commercial flight sa mga Sugboanon hilabina sa mga taga Isla sa Bantayan.

Nihangyo si Garcia ngadto sa operators nga ipabilin sa P888 ang presyo sa ticket aron makapalit dili lang ang mga turista apan apil ang mga taga isla nga gustong mopauli sa ilang lungsod sa Isla sa Bantayan o mahimong accessible kini sa tanan.

"Ang ako lang gyud gihangyo, the initial plan was kani ra daw inaugural ang P888, human mobalik na daw sa P2995... Unsa may inyong gusto, lima kabuok inyong pasahero mobayad og 2,995 or 50 kabuok nga mobayad og P888...It will cost you the same, one flight", matud ni Garcia kinsa nagkanayon nga kon gusto masustiner ang maong commercial flight angayan nga ipabilin sa P888 ang pletehan.

Si retired major general Gilbert Llanto,  chairperson sa Prime Aces Holdings Corp. nga nag-operate sa bag-ong gibuksan nga commercial fligt nagkanayon nga ilang gihatagan og bili ang  Bantayan dili lang isip usa ka tourism hub apan apil na usab ang komersiyo ug ekonomiya niini.

“Amo ning ipadayon kay nakita namo ang dako nga prospect, ang malambuon nga prospect for Bantayan”, matod ni Llanto.

Gipadayag ni Llanto nga gilaraw nila nga mapalapdan ang ilang operasyon sa Bantayan diin mamahimong makabiyahe direkta padulong isla gikan sa ubang probinsiya nga dili na kinahanglang moagi sa Sugbo.

Matud sa King Aces Travel and Tours pinaagi sa Facebook page niini nga ang ilang promo sa P888 magsugod sa Agosto 28 hangtud Oktubre 27 karong tuiga gikan MCIA padulong sa Bantayan Island.

Ang biyahe sa eroplano niini padulong ug gikan sa Bantayan  kaduha matag semana o matag adlaw’ng Biyernes ug Domingo.

Ang Prime Aces Holdings Corporation (PAHC) usa ka subsidiary sa King Aces Travel and Tours, Inc., (KATTSI).

Ang KATTSI usa usab kini ka travel and touring agency nga na establisar sa ACDI Multipurpose Cooperative nga ang mga miyembro gikan sa Armed Forces of the Philippines (AFP) apil mga retirees, regular civilian employees, reservists, ug aktibo nga miyembro sa military. — BDB BANAT NEWS