CEBU, Philippines — Gipadayag ni Acting Mandaue City Vice Mayor Nerrisa Soon-Ruiz ang pagpatuman og mga kausaban sa pagpadagan sa session nga ilang ipahigayon nga mga sakop sa konseho isip presiding officer niini.
Matud ni Ruiz nga isip presiding officer iyang tinguhaon ang paghashas sa tukion nilang ordinansahon o resolusyon sa dili pa nila himuon ang pag-aproba niini.
Naglakip sa mga kausaban nga iyang ipatuman mao ang pagbarog sa nangamahan sa iduso nga ordinansahon o resolusyon ug dili ang mga consultant niini maoy mobarog sa pagpasabot sa panahon sa ilang pagtuki.
Nunot niini, iyang hangyoon ang mga matag sakop sa konseho sa pagtuon daan sa giduso nilang ordinansahon o resolusyon sa pagpakita sa tinuod niining baroganan ug dili kay mag-agad lang kon unsa man ang gimando kanila sa executive department.
Gitataw ni Ruiz nga ang executive nga mao ang mayor ug ang legislative nga sila nga mga konsehal ang managlahi ang ilang mga kaakohan.
Hinuon iyang gipasalig nga ilang suportahan ang mga proyekto ug programa nga iduso sa konseho kon kini gitumong alang sa kinabag-ang Mandauehanon.
Gipasalig usab ni Ruiz nga kanunay niyang tahuron ang tingog sa mayoriyang sakop sa konseho nga anaa sa kampo ni suspended Mayor Jonas Cortes.
Nasayran nga sa pagsaka ni Vice Mayor Glenn Bercede isip acting mayor nunot sa pagkasuspenso ni Cortes sulod sa usa ka tuig si Ruiz isip numero unong sakop sa konseho ang nisaka usab isip acting vice mayor nga maoy hinungdan nga tulo na lang ka konsehal ang sakop sa minoriya. (BANAT NEWS)