MANILA, Philippines — Gipahibawo sa Commission on Election (COMELEC) sa Dakbayan sa Talisay nga bisan og holiday padayon ang ilang pagdawat sa mga tawo nga magparehistro.
Si Atty. Charisse Faith Sojor, election officer sa Talisay nibutyag nga gihimo nila kini aron ang mga trabahante adunay higayon sa pag asikaso sa ilang rehistro.
Gani sila nangandam sa dagsa sa mga tawo ilabi na nga usa ka buwan nalang sa dili pa ang deadline sa voter registration ning tuiga.
Sugod niadtong Agusto 16 diha sila sa ikaduhang andana sa usa ka mall sa Barangay Bulacao nag opisina.
Kabahin kini sa ilang satellite office aron sab nga mapahiluna ang mga tawo.
Sa milabay nga tuig, taas nga linya ang ilang nasinati gumikan sa mga nagparehistro nga duol na ang deadline.
Gipasalig ni Sojor nga nangandam na sila sa mao unya gihapon nga sitwasyon apan iyang gidasig ang katawhan nga mas maayo nga magparehistro na karon aron dili na magdali-dali o mag apas sa deadline sunod buwan. (BANAT NEWS)