CEBU, Philippines — Wala na mobati og kahingangha si Mayor Jonas Cortes sa suspension order sa Ombudsman nga gipahamtang ngadto kaniya.
Kini ang iyang gipadayag atol sa press conference nga gipahigayon diha Cebu International Convention Center (CICC) human sa clean up drive.
Matud ni Cortes nga ilang gilaoman nga ang suspension subay usab kini sa ilang nasayran nga mga hulga nga mga kaso batok sa matinud-anon niyang panerbisyo sa mga Mandauehanon.
Nunot niini, iyang gihulagway nga ang pagsuspenso kaniya sa katungdanan usa ka hagit ug mga pagsulay nga makahatag kaniya og dugang kalig-on sa pagbarog sa kaayohan sa kinabag-an nga iyang gialagaran.
Si Cortes nagkanayon nga taliwala niining maong mga pagsulay sa gihapon magpadayon siya sa pagserbisyo isip pinili nga mayor sa mga Mandauehanon.
Gipadayag ni Cortes nga wala siya mahadlok sa maong suspension tungod kay wala man kini maglambigit sa pagpangawkaw apan ang iyang katuyoan nga kahatagan og tukmang serbisyo ang kinabag-ang molupyo sa kabarangayan. — BDB BANAT NEWS