CEBU, Philippines — Lima ka indibidwal ang naangol diin duha niini talandugon ang kahimtang dihang nagbangga ang duha ka motorsiklo sa National Highway, sa Barangay Arpili, Lungsod sa Balamban, Miyerkules sa gabii, Agosto 21, 2024.
Nagbangga ang motorsiklo nga Yamaha NMAX nga tulo ang sakay ug Suzuki Gixer nga duha ka buok ang sakay.
Ang NMAX gimaneho ni Junry Villabas Capangpangan, 22 anyos, residente sa Barangay Maiingit, Toledo City samtang ang iyang mga angkas mao sila si Nelson Illustrisimo, hingkod ang panuigon nagpuyo sa Barangay Biasong ug Carl Louie Navasca, hingkod ang panuigon residente sa Barangay Biasong, Lungsod sa Balamban.
Samtang ang driver sa Suzuki nga motorsiklo mao si Joshua Abantao Bachica, 26 anyos, nagpuyo sa Barangay Buanoy ug angkas niya iyahang uyab nga si Nedlene Corposales Caldoza, 26 anyos, taga Barangay Buanoy sakop gihapon sa Balamban.
Sigon ni Police Lieutenant Colonel Julius Garcia, Hepe sa Balamban Police Station base sa ilang inisyal nga imbestigasyon ang mga sakay sa NMAX nga motorsiklo gikan sa Barangay Buanoy ug giingong nakainom ang mga sakay.
Pag-abot nila sa Barangay Arpili ug paingon na unta sila sa Barangay Maiingit giingong nakasugat nila ang motorsiklo nga Suzuki 150 nga naa sa pikas lane.
Ang NMAX migawas sa ilahang lane maong nahitabo ang head on collision sa duha ka motorsiklo.
“Sa atong nahitabo tanan sila gidala sa hospital pero duha ang involve nga gi refer gyud sa Cebu City hospital, ang driver sa Suzuki Gixer nya ang backride pud sa Yamaha NMAX”, sigon ni Lt. Col. Garcia. (BANAT NEWS)