CEBU, Philippines — Niabot na sa Sugbo ang delegasyon gikan sa Russia alang sa tulo ka adlaw nga Tourism, Health, and Business Summit.
Ang delegasyon nga gilangkuban sa mga pangulo sa nagkadaiyang government committees ug leader sa medical sector nga gipangulohan ni Vyacheslav Gennadyevich Kalganov, deputy chairman sa committee for external relations sa Saint Petersburg.
Gisugat sila nila ni Bokal Glenn Anthony Soco ug Stanley Caminero ug Provincial Tourism Officer Maria Lester Ybañez diha sa Mactan Cebu International Airport (MCIA) niadtong Domingo, Agosto 19, 2024.
Ang summit nga pasiugdahan sa Kapitolyo mohisgot sa mga pag-alayon tali sa Russia ug Sugbo sa nagkadaiyng sektor sama sa medical, turismo, patigayon ug pagpalambo sa ekonomiya.
Ang maong summit nga gikatakda karong adlawa hangutd sa Agosto 23, 2024 naplano kini sa Kapitolyo human nibyahe si Gobernador Gwendolyn Garcia ngadto sa St. Petersburg sa Russia ug nitambong sa St. Petersburg International Economic Forum.
Gawas sa maong summit, ang delegasyon sa Russia mosaksi usab sa Pasigarbo sa Sugbo karong Agosto 25, 2024 ug isuroy sila sa Kapitolyo ngadto sa nagkadaiyang suroyanan o tourism destinations sa Lalawigan sa Sugbo. BDB BANAT NEWS