CEBU, Philippines — Gitak-opan karon sa buhatan sa Business Permit and Licensing Office (BPLO) sa Dakbayan sa Mandaue ang mga kan-anan nga pungko-pungko diha sa reclamation area duol sa tunghaan sa Cebu Doctor’s University.
Ang buhatan sa BPLO nga gipangulohan ni Atty. August Lizer Malate ang nitak-op sa maong mga kan-anan tungod sa kakuwang sa gikinahangkan nga permit niini.
Ang City Health Office nakamatikod sa maong mga kan-anan nga tapokan sa mga kustomer nga mga tinun-an ug mga nagtrabaho gikan sa laing lugar.
Namatikdan usab nga ang maong tindahan walay mga gikinahanglan nga mga dokumento sa pagsiguro nga luwas ang pagkaon nga ilang idalit ngadto sa ilang mga customer.
Hinuon gipaniguro sa buhatan sa BPLO nga mahibalik ang ilang naandan nga operasyon sa higayon nga makabaton na sila og business permit gikan sa BPLO. BDB BANAT NEWS