CEBU, Philippines — Ang Dakbayan sa Talisay ni-activate na sa anti-dengue task force diin tumong niini aron masiguro nga diha pa lang sa barangay masumpo na ang mga lamok nga nagdala og dengue.
Si Dr. Rey Cesar Bautista, acting Talisay City health officer nibutyag nga ang barangay maoy magsige og pahinumdum sa katawhan sa paglimpiyo sa palibot aron ang lamok walay lugar nga kapangitlogan. Matud ni Baustista nga ang pagyaob sa mga butang nga mapundohan og tubig usa sa mga pamaagi sa pagsumpo sa dengue.
Giangkon ni Bautista nga dili malukop sa anti-dengue task force sa pagbalay-balay ang kabarangayan sa siyudad hinungdan nga dako og tabang kong ang matag moluyo sa lugar magpakabana usab kini.
Padayon usab ang ilang misting ug fogging diin tulo ka misting ang ilang mahimo matag adlaw. (BANAT NEWS)