CEBU, Philippines — Nagplano ang Philippine National Police (PNP) nga mo-tap sa mga security guards isip intelligence operatives alang sa pagpalambo sa kaluwasan sa publiko.
Si Maj. Gen. Edgar Alan Okubo, direktor sa PNP Civil Security Group (CSG), miingon nga dako og matabang ang mga blue guards pagkolekta og mga impormasyon batok mga krimen ug uban pang hulga sa seguridad sa publiko ug sa nasud. Kini tungod kay bisan asang dapita, komersiyal man, tugpahanan, pantalan, terminal, mga establisamento ug uban pa adunay mga gwardiyang nagbantay ug dako sila og gamit sa intelligence collection para sa law enforcement units sa nasud.
Sumala pang Okubo wala gyud ma maximized ang gamit sa mga blue guards may kalabotan sa nasudnong seguridad, terorismo, pangispiya, smuggling, drug trafficking, illegal Philippine offshore gaming operators (POGOs), ug uban pang mga krimen.
Atol sa closing ceremony sa Basic Information Collection and Analysis Seminar (BICAS) alang sa mga private security agencies, iyang giawhag ang mga security firms nga magpadayon sa adlaw-adlaw nga intelligence briefs ug isumite ang adlaw-adlaw nga mga report alang sa assessment validation sa mga intelligence units.
Sa pagkakaron, adunay dili momenus kapin tunga sa milyon ka mga gwardiya sa tibuok Pilipinas. — /IBM (BANAT NEWS)