CEBU, Philippines — Gihugopan sa mga molopyo sa kabarangayan ang Job Fair nga gipahigayon kagahapon Sabado Agosto 17, 2024 sa Mandaue City Sports and Cultural Complex.
Kini gipasiugdahan sa Public Employment Service Office (PESO) sa siyudad sa Mandaue.
Liboan ka mga bakanteng trabaho ang gitanyag sa gihimo nga Local ug Overseas Job Fair sa PESO sa Mandaue City.
Sa nasayran nga kapin sa 34 ka mga lokal nga kompaniya ug usa ka International Company ang niapil sa gipahigayon nga Job Fair.
Una niini si Mandaue City Mayor Jonas Cortes nagdasig sa PESO Mandaue City sa pagtabang sa mga nanginahanglan og trabaho aron sayon na lang sa mga nangita og trabaho sa pag-apply.
Lakip usab sa mipadayag og suporta sa kalihukan mao si City Councilor Maline Cortes-Zafra kauban ang kadagkuan sa DOLE 7 ug PESO Mandaue City. (BANAT NEWS)