CEBU, Philippines — Nipahigayon og walkthrough ang Cebu City Police Office (CCPO) sa rota alang sa umaabot nga Pasigarbo sa Sugbo 2024 sa niaging adlaw ug aduna sila'y rekomendasyon ngadto sa organizers alang sa mas hugot nga pagpatuman sa seguridad.
Nagkanayon si Police Lieutenant Colonel Maria Theresa Macatangay, deputy city director for operations sa CCPO nga niadtong Huwebes aduna sad sila'y meeting sa regional office aron matutokan ang kalihokan.
Padad-an og police augmentation ang CCPO gikan sa nagkalain-laing units sa PRO-7 hinungdan nga moabot sa kapin sa 1,000 ka polis ang magbantay sa seguridad atol sa kalihokan.
Giklaro ni Macatangay nga walay maapektohan sa mga tawo nga gipakatap sa mga police station.
"Akong ipadayag lang is that walay angay kabalak-an ang atong community especially naa bayay dagko nga incident lang recently ang atoang anti-criminality effort will not be affected and it is in place actually gi-strengthen pa gyud nato", matud ni Macatangay.
Apil usab sa bantayan sa kapolisan ang mga billeting area sa mga delegado.
Gipaabot usab nga mag-full alert status ang CCPO subay na sa maong kalihokan.
"We have cancelled all leaves around that time so we are 100 percent intact atoang kapolisan sa Cebu City not only on the day of Pasigarbo", dugang ni Macatangay. BDB BANAT NEWS