CEBU, Philippines — Naapil sa mga nominado isip “Most Desirable Region” lukop kalibotan ang Sugbo sa ika-23 nga Annual Wanderlust Reader Travel Awards sa tuig 2024.
Uban sa Sugbo ang Palawan nga apil sa mga nominado usab sa “Most Desirable Island” nga kategorya.
Samtang ang Pilipinas naapil sa nominado isip “Most Desirable Country (Rest of the World)” sa lima ka subcategories sama sa “Adventure”, “Nature and Wildlife”, “Culture and Heritage” , “Grastonomy” ug “Sustainability”.
Apil sa mga nominado nga lugar sa “Most Desirable Region” mao ang Abu Dhabi, Alberta, Alula, American South, Arizona sa USA, British Columbia, California, Dubai, Florida ug uban pa.
Ang Department of Tourism niawhag sa mga Pilipino nga mobotar sa Pilipinas lakip na sa Cebu ug Palawan sa mga kategorya kon asa nominadong ang maong mga lugar.
Ang Annual Wanderlust Travel Awards 2024 usa ka pasidungog nga giorganisar sa Wanderlust Travel Magazine, usa sa pinakadugay nga travel magazine sa United Kingdom. (BANAT NEWS)