Dagdag bawas

Giduso ni Senador Imee Marcos ang balaudnon nga magpataas sa edad sa pagretiro sa mga polis gikan sa 56 ngadto na sa 57.

Giduso usab sa presidente sa Senado nga si Chiz Escudero ang balaudnon nga magpaubos sa edad sa mga magtutudlo ug mga non-teaching personnel sa Department of Education gikan sa edad 65 ngadto na sa 60.

Kun ugaling mauyonan sa Kongreso ug Presidente ang mga magtutudlo ug mga personnel sa Departamento sa Edukasyon, puwede na nga makanegosyo ug makabaton og taas nga panahon sa ilang pamilya.

Gusto nga patas-an ni Senador Marcos ang edad sa mga police sa pagretiro tungod kay matud pa niya mitaas ang kinabuhi sa mga police basi sa mga pagtuon. Pagseguro nga magpabilin sa organisasyon sa kapolisan ang mga taas na og kasinatian sa pamolis.

Kun mao man ugaling kini, mahikawan ang mga polis og dugang pang usa ka tuig nga makauban na unta niya og taas nga panahon ang iyang pamilya ug makanegosyo kun gustohon niya.

Kun ang rason sa pagpataas sa edad sa pagretiro aron nga maseguro nga magpabilin sa serbisyo ang mga taas na og kasinatian, nganong paubsan man ni Senador Chiz Escudero ang edad sa pagretiro sa mga magtutudlo ug non-teaching personnel? Tungod ba kay lahi-lahi ang matang sa trabaho sa polis ug magtutudlo?

Dili ba mas haum man sa mga magtutudlo ang taas nga edad sa pagretiro kay sa polis? Nganong pamub-an man kini?

Mas maayo seguro nga parihason nalang tanan ang edad sa pagretiro sa mga nagtrabaho sa gobiyerno apil na ang mga hurado sa atong mga hukmanan.