Problema sa supply sa tubig sa Malabuyoc gi-aksyonan na

CEBU, Philippines — Giaksyonan sa kagamhanan sa lungsod sa Malabuyoc ang suliran sa suplay sa ilang tubig.

Kini maoy usa sa mga gihisgutan ni mayor Edang Piedad atol sa iyang State of Municipality Address (SOMA) niadtong miaging semana.

Si Piedad niklaro nga una nilang gihimo mao ang pagkuha sa serbisyo bahin sa konsultasyon alang sa master plan sa Malbuyoc Waterworks System.

Sa pagkakaron ang dinalian nila nga tubag sa suliran sa suplay sa tubig mao ang paghatag og water tanks sa tanang barangay sa Malabuyoc ug ang pagdeliver og tubig.

Ang long term nga solusyon nila mao ang pagloan og P120M para sa pag upgrade sa ilang waterworks system aron makasustiner na kini sa tanang molupyo.

Ang problema sa tubig mao gyud ang numero uno nga reklamo sa mga residenti sa Malabuyoc diin naabot gyud sa social media ang mga reklamo.

Si Piedad nihatag sab sa iyang seven-point agenda sa iyang administrasyon.

Matud pa niya nga isip kanhi tindera og isda kaniadto gusto siya nga adunay publikong merkado nga hamugaway sa tanan kay siya nakasabot gyud kaayo sa mga gagmay nga negosyante.

Sunod buwan ilang inagurahan ang ilang bag-o nga merkado.

Gipasigarbo usab sa mayor nga daghan sila og karsada nga gipang ayo sa nagkalain-laing dapit sa lungsod.

Samtang nihatag usab sila og luna ngadto sa CTU aron sila makapatukod og bag-o nga building nga kapahimuslan sa kabataan alang sa ilang pagtungha.

Ang Malabuyoc naila nga drug free municipality sa unang tuig ni Piedad kay tinguha niya nga hapsay ug malinawon nga lungsod.

Dugang pa niya nga suportado niya ang panglawas sa katawhan hinungdan nga siya padayon nga nanghatag og ayuda sa medical, burial ug uban pa. Nagkanayon si Piedad nga daghan pa nga mga proyekto ang naa sa iyang plano ug siya nanghinaot nga iya kining mapatuman sa iyang administrasyon. (BANAT NEWS)