Garcia andam makig-estorya sa transport groups

CEBU, Philippines — Nagdumili sa paghatag og posisyon si acting Cebu City Mayor Raymond Alvin Garcia may kalabotan sa Nationwide Public Transportation Modernization Program (PTMP) apan andam siya makig estorya sa transport sectors sa dakbayan.

Kini human ang Department of Transportation (DOTr) mipadayag nga ang mayoriya sa transport sector karon  nakauyon sa modernisasyon taliwala sa pipila ka panawagan gikan sa Senado nga suspensohon una kini aron paminawon ang mga yangungo sa mga transport operators.

Ang Federation of Cebu Transport Cooperatives ug Allied Transport Cooperatives miingon nga walay transport disruption nga mahitabo apan mohimo lang sila og protest rally nga gitawag og "unity walk" karong adlawa (Lunes), Agosto 8, 2024.

Ang grupo nasagmuyo sa plano sa Senado tungod kay para nila dili makiangayon nga silang mayoriya nga nisanong sa programa maapektahan tungod lang sa pipila ka operators nga nagmagahi sa pagsanong sa kausaban sa public transport system sa nasud.

Kini aron ipakita ang ilang pagsupak sa Senate Resolution No. 1096 nga nagtinguha sa pagsuspenso sa pagpatuman sa PTMP.

“I will not make a stand regarding that matter but if that comes, mag prepare gyud ta how to address the transportation situation,” matud ni Garcia sa pakighinabi sa mga tigbalita niadtong Biyernes, Agosto 8, 2024.

Dihang gipangutana kun andam ba siyang makigtagbo sa mga transport groups sa maong butang si Garcia mitubag: "Definitely."

Hinuon gipadayag ni Garcia nga andam kanunay ang dakbayan pagtabang sa mga sumasakay matag adunay transport strike.

Apan siya mapasigarbuhon nga ang transport sector sa dakbayan wala gyud moapil sa bisan unsang mga national transportation strike tungod kini sa "maayong relasyon” sa siyudad ug sa maong sektor.

Ang transport strike makaepektar sa ekonomiya  hasta sa mga estudyante ug empleyado nga nagsalig sa mga pasaheroan.

Sa bag-ohay lang nga pamahayag ni Transportation Secretary Jaime Bautista kun suspensuhon ang PTMP niining panahona makaapektar kini sa tanan ug mausik lang ang puhonan na sa gobiyerno nga nagamit na para niini. (BANAT NEWS)