Germany ug Pilipinas gikatakdang mopirma og defense agreement
CEBU, Philippines — Nagkasabot ang Pilipinas ug ang nasud sa Germany nga palawman ug palig-unon ang kooperasyon tali sa ilang mga militar human sa panagkita nilang defense secretary Gilberto Teodoro ug German Defense Minister Boris Pistorius kagahapon, adlaw nga Domingo.
Senyales kini sa determinasyon sa Pilipinas nga atbangan ang gipanghimo sa China diha sa teritoryo niini sa West Philippine Sea.
Ang duha ka opisyal nagkita sa Manila ug nisaad nga mopirma sila og defense cooperation agreement sa kataposang bahin ning tuiga.
Matud pang Teodoro, ang unod sa kasabotan nakatutok sa "mutual understanding regarding capabilities, training (and) exchange of information."
Kahinumdoman nga padayon ang nagkainit nga tension tali sa Pilipinas ug sa China nunot sa padayong pagpanghilabot sa naulahi sa mga kalihokan sa mga Pilipino diha sa WPS.
Ang South China Sea diin nahimutang ang WPS giangkon sa China nga ilaha bisan pa sa 2016 Arbitral Ruling nga nag-ingong wala kini legal nga basihan.
"We collaborate because we have a shared vision of respect for the United Nations Charter... and our desire to see a stable and peaceful Indo-Pacific," matud pang Teodoro.
Misaad ang duha nga himuong malungtaron ang maayong relasyon sa militar sa duha ka mga nasud ug possibly sab nga matabangan sa Germany ang Pilipinas makabaton og dugang mga gamit militar. Ang Germany usa sa labing karaang formal defense partner sa Pilipinas pinaagi sa 1974 administrative agreement diin dunay mga sundalong Pilipino ang gipadala ngadto sa maong nasud alang sa dugang trainings.
"The ministers strongly opposed any unilateral attempt to advance expansive claims, especially through force or coercion," matud pa nilang Pistorius ug Teodoro sa gipagawas nga joint statement.
- Latest
