CEBU, Philippines — Moabot sa P44 milyones nga balor sa illegal nga drugas ang nasakmit sa Police Regional Office(PRO)-7 sulod sa usa ka ka semanang operasyon sugod niadtong Hulyo 21,2024.
Sa report sa PRO-7 moabot sa 569 ka tawo ang nadakpan dihang gipatuman ang agresibong operasyon batok sa illegal nga drugas, illegal gambling, loose firearms ug wanted persons.
Sa maong ihap, 161 ka mga suspetsado ang nalambigit sa illegal nga drugas, nakasakmit sila og 6,585.63 gramong shabu nga nagkantidad og P44.7 milyones ug drug paraphernalia.
Samtang, 266 ang nasikop gumikan sa illegal gambling activities samtang 18 ang suspetsado gumikan sa illegal possession of firearms.
Dayon 124 ka most wanted ug other wanted persons ang nasikop pinasikad sa warrant of arrest. Sa Lapu-Lapu City, usa ka senior citizen ang nadakpan sa buybust operation sa Sitio Puso Center sa Barangay Mactan, Siyudad sa Lapu-Lapu alas-12 pasado sa miaging tungang gabii Hulyo 30, 2024.
Ang suspek nga taga Sitio Ponce, Barangay Capitol Site sa Siyudad sa Sugbo nadakpan sa mga sakop sa City Drug Enforcement Unit (CDEU) ug City Intelligence Unit (CIU) sa LCPO.
Nasakmit gikan kaniya ang 18 ka transparent plastic packs nga adunay sulod gidudahang shabu nga mokantidad og P10.4 milyones ug ang P60 mil nga boodle money nga maoy gigamit sa poseur buyer sa pagpalit kaniya og shabu. -- Romeo Limpangog/IBM BANAT NEWS