Birthday wish nga mapriso ang ama-ama 

CEBU, Philippines — Nasikop sa mga operatiba sa National Bureau of Investigation Central Visayas Regional Office (NBI-CEVRO) uban sa DSWD-7 ang usa ka ama-ama human kini giingong nanglugos sa iyang 14-anyos nga dalagitang hinablos sa makadaghang higayon sugod pa nag-edad ang biktima og 8-anyos u gang labing uwahi niadtong Hulyo 26,2024 diha sa dakbayan sa Talisay.

Ang 32-anyos nga ama-ama kanhi OFW ug nagtrabaho karon isip home based nga virtual assistant.  Ang pagsikop kaniya nahitabo human ang ginikanan sa classmate sa biktima misang-at og reklamo ngadto sa NBI.

 Gipugngan sa Banat News ang pangalan sa suspek ug mga nalambigit sa hitabo aron mapanalipdan ang pagkatawo sa biktima ug pamilya niini.

Nabisto ang gibuhat sa suspek human ang biktima nisugilon ngadto sa iyang classmate nga usa bahin sa gibuhat kaniya sa ama-ama.

Matud ni NBI-7 Supervising Agent Atty. Wenceslao Galendez Jr., nga gawas sa report sa ginikanan sa classmate sa biktima, ilang gipangayoan og statements ang mga kahigalaan, classmates, ug mga maestra nga gisumbongan sa bata kaniadto ron makompirmar ang nahitabo.

Sumala pa sa  NBI nagsugod ang pagpangabuso dihang 8- anyos pa lang ang dalagit ug nagpadayon kini hangtod karon.

Sa dugang imbestigasyon sa NBI, buhaton sa suspek ang krimen alas 2 hangtod alas 3 sa kaadlawon bisan og katupad ra niini iyahang higdaanan ang tulo niya ka mga manghod nga lalaki.

Ang NBI-CEVRO uban sa DSWD-7 ug LGU representatives gikan sa Talisay City mi-rescue sa biktima pasado alas-2 sa hapon.

Gibutyag sa bata nga kataposan siyang gilugos niadtong Biyernes sa kaadlawon, Hulyo 26,2024. Nianang pagkahapon gidakop ang suspek usa ka semana na ang nilabay sukad nga nisumbong ang biktima sa classmate.

Sumala pa sa mga otoridad, lima ka tuig nga nag-ampo ang biktima nga maluwas gikan sa suspek. 

Mitug-an sab kini nga kanunay siyang dapatan sa suspek bisan gamay nga sayop ug gihulga usab kini nga dili isumbong ang iyang gibuhat kung dili gusto sa biktima nga mabungkag ilang pamilya.

Niadtong Hulyo 29, 2024, ang suspek gipaubos sa inquest proceedings sa City Prosecutor sa Talisay City sa kasong Statutory Rape Art. 266-A sa Revised Penal Code nga giamendahan sa RA 8353 ug RA 11648.

Katorse anyos na kagahapon ang biktima, Hulyo 30, ug para kaniya nahatag na gyud sa kataposan ang lima ka tuig na niyang gipangayong “birthday wish,” ang pagtapos sa iyang pag-antos ug manubag ang iyang ama-ama.

Matud ni Galendez, nibalibad sa paghatag og statement ang inahan sa biktima kay murag naglibog pa kini sa nahitabo. -- Gie-Ann N. Tapic ug Rowena Capistrano/IBM BANAT NEWS