Rama nidepensa sa P50B 2023 annual budget

CEBU, Philippines — Si suspended Cebu City Mayor Michael Rama nidepensa nga ang 2023 annual budget nga P50 bilyones wala mamugna “in thin air” subay sa audit report sa Commission on Audit (COA).

Atol sa news forum kaghapon gipadayag ni Rama nga andam niyang tubagon ang tanang pangutana kabahin sa COA report sa tukmang panahon pinaagi sa iyang gitawag nga “huge presscon”.

“I can answer it at the proper time. Number 1, wa man ko maghuna-huna anang P50 (billion) just out of thin air so I will answer it”, matud ni Rama.

Gitumbok ni Rama ang P50 bilyones nga annual budget nga giaprobahan alang sa 2023 fiscal year aron masiguro nga makab-ot ang iyang Singapore-like vision alang sa Dakbayan sa Sugbo.

Bag-o lang, ang COA nagpagawas sa 2023 annual alang sa Dakbayan sa Sugbo diin daghang wala mahuman nga mga proyekto, unliquidated nga pundo ug uban pang kantidad nga nagasto ang gi-flagged down.

 Ang COA nirekomendar nga hugtan ang mga lakang sa pagmenos sa mga galastohan nga wala kinahanglanan ug dili produktibo.

“I am just letting you know that I am ready by now. Because naa may mga grupo nako. I don’t hit things out of nothing, I always tap cerebral prowess”, ni Rama pa.

Matud ni Rama nga iyang tubagon ang COA findings uban sa laing departamento sa city hall ilabina ang Local Finance Committee (LFC) nga giingong apil usab sa nagplano sa P50 bilyones nga budget.

Gipadayag usab ni Rama ang iyang tuyo nga i-correct ang paggamit sa termino nga "kasamtangan nga administrasyon" ug dili niya gusto nga kini iabuso.

“Kay murag nag-conclude mo nga wa nakoy labot ani, apil mi tanan ani, apil, kanang budget pag-approve ana… apil sila”, butyag ni Rama.

Kabahin sa wala paggamit sa P83 milyones nga ekipo alang sa Cebu City Medical Center (CCMC) nga bag-o lang usab nga gi-flagged down sa COA gipili usab ni Rama nga tubagon kini sa giingong huge presscon.

“I am bringing the truth and by that time, truth will set me free. I guarantee”, dugang ni Rama. (BDB) BANAT NEWS