Guidelines pagpatuman sa MATATAG Curriculum gipagawas na

CEBU, Philippines — Nagpagawas na og policy guidelines ang Department of Education (DepEd) alang sa pagpatuman sa MATATAG Curriculum aron paghatag og konteksto, direksyon, ug pagpasabot sa mga feature niini.

Ang MATATAG Curriculum sugdan sa kindergarten, Grades 1, 4, ug 7 sa SY 2024-2025, gisundan sa Grades 2, 3, 5, ug 8 sa SY 2025-2026, ug Grades 6, 9, ug 10 sa SY 2026-2027, nga adunay managlahing guidelines alang sa Grade 11 ug 12 nga i-isyu sa DepEd.

Kini ipatuman subay sa gilatid nga minimum standards sa tanang pampubliko ug pribadong eskwelahan, state universities and colleges (SUCs), local universities and colleges (LUCs), ug Philippine Schools Overseas (PSOs) nga nagtanyag sa batakang edukasyon.

Sumala sa DepEd order No. 010, s. 2024, ang MATATAG Curriculum naglangkob sa mga pangandoy sa mga estudyanteng Filipino nga nasulat sa Ambisyon Natin 2040, aron malampuson sa umaabot nga mga hagit.

Gawas niana, gipalambo ang pagtudlo sa global citizenship ug diversity samtang nagpasiugda sa usa ka future-oriented nga panghunahuna nga naghatag og gahum sa mga estudyante sa pagdawat ug paghulma sa kabag-uhan.

Ang unang prinsipyo sa kurikulum, mas palig-onon pa niini ang pagpatuman sa mga programa sama sa Special Needs Education (SNEd), Madrasah Education Program (MEP), Indigenous Peoples Education Program (IPEd), Special Curricular Program (SCP) ug Alternative Learning System (ALS) aron matubag ang mga panginahanglan sa edukasyon.

Alang sa mga magtutudlo, kini magsilbi isip nag-unang giya alang sa pagplano sa pagtudlo, nga naglangkob sa pagpili sa hisgutanan, pagpatuman sa mga estratehiya sa pagtudlo, paggamit sa kapaninguhaan sa pagkat-on, ug paggamit sa mga assessment tools.

Alang sa mga instructional leaders, mogiya kini kanila sa pagmugna og supervisory ug management plans aron pagmonitor sa mga instructional delivery, monitor learning gains, ug paghatag og tukma nga teknikal nga tabang sa mga magtutudlo ug school heads.

Sa laing bahin, si DepEd-7 regional director Salustiano Jimenez mitaho nga ang Central Visayas wala pa kaabot sa ilang target nga 2 milyon ka mga tinun-an nga mo enrol karong school year.

Sigon ni Jimenez, ang Central Visayas dunay dul-an sa 1.7 ka milyon ngadto sa 1.8 ka milyon ka mga tinun-an nga na-enrol, ug padayon nga nag-apelar sa mga ginikanan o guardians nga ipa-enrol ang ilang mga anak sulod sa unang semana sa pagbukas sa klase. Gie-Ann N. Tapic/MEL BANAT NEWS