CEBU, Philippines — Hingpit na gayod nga nakabaton og Certificate of Program Compliance (COPC) sa Commission on Higher Education (CHED) ang Mandaue City College.
Kini ang gipahibalo ni Konsehal Malcolm Sanchez ngadto sa konseho atol sa ilang regular session kagahapon, Hulyo 29, 2024.
Si Dr Joey Revamonte nga maoy administrador sa maong tunghaan miingon nga sa kasamtangan ang MCC ang nakabaton na og siyam ka mga programa nga gihatagan na og COPC sa CHED.
Nalakip na niini ang Information Technology, Industrial Technology, Business Administration, Marketing, Elementary Education, ug Secondary Education.
Gihangop ni Mandaue City mayor Jonas Cortes ang maong kalamboan nga naatol usab sa pagbukas sa klase.
Si Mayor Cortes miingon nga nag-una karon sa iyang gitinguha mao nga makabaton na og kaugalingon nga lugar ang MCC sa dakbayan.
Dugang pa niya nga ang katukoran sa MCC building magsugod usab kon mahingpit na unya sa pagbalhin ang Mandaue City Jail ngadto sa Dunggoan sa Barangay Basak.
Gitataw niya nga ang luna sa BJMP ug ang kanhi giukopar sa Land Transportation Office (LTO) sa Barangay Looc nga hingpit na unya nga mabakante mao usab ang dapit nga pagatukoran sa tulo ka andana nga building sa MCC.
Sa nasayran ang MCC sa pagkakaron nahimutang kini sa luyong bahin sa Mandaue City Cultural and Sports Complex sa Sitio Tribunal sa Barangay Centro sa maong siyudad.