CEBU, Philippines — Usa ka 25-anyos nga lalaki nga giingong naungo sa online nga sugal ang nangunay og kawat sa P2,500 nga kwarta sa iyang uyoan samtang natulog diha sa Barangay Poblacion Pardo, Siyudad sa Sugbo sa niaging adlaw.
Ang suspetsado nga si alyas “Clark”, residente sa naasoy nga lugar nasikop kini tungod kay nakamata ang iyahang uyoan nga nag-edad og 62-anyos diin bisan og nakadagan ang suspetsado nailhan gihapon kini sa biktima.
Matud sa suspetsado nga nangawat siya gumikan kay iyang gigamit pagduwa og scatter.
Nangangkon ang suspetsado nga usa ka semana pa lang siya nagduwa sa maong online nga sugal diin naingganyo ra usab siya sa uban nga iyang nakita nga nagduwa niini.
Giingong iuli unta niya ang kwarta nga iyang gikuha sa iyang uyoan apan napakyas siya sa iyang tinguha tungod kay nahurot og kapildi ang kwarta nga iyang gipuhonan sa sugal. Base sa imbestigasyon sa Inayawan Police Station sa Cebu City Police Office ang biktima nibutyag nga ikatulong higayon na ang gihimong pagpangawat sa suspetsado og kwarta. (BANAT NEWS)