Gidemolis nga estraktura sa Apas, dili matabangan sa siyudad—DWUP

CEBU, Philippines — Pito ka mga estrakturang gigamit sa negosyo diha sa Barangay Apas sa Dakbayan sa Sugbu ang gipangguba sa demolition team nga giingong walay maapil sa coverage protection sa kagamhanan kay naa kini sa pribadong lote nga bag-o lang gipaboran sa korte.

Kini maoy pagklaro ni Cebu City Division for the Welfare of the Urban Poor (DWUP) Ronald Anthony “Butch” Librando sa pakighinabi sa Banat News/The Freeman kagahapon (Martes), Hulyo 23, 2024.

Kini human gihimo ang demolisyon sa Purok 6, Sitio San Miguel, Barangay Apas. Matud ni Librando misupak ang pipila sa mga okupante atol sa demolisyon nga gimando sa korte human sa ilang pag-isyu of certificate of non-coverage.

Gipasabot niya nga adunay special law nga naglangkob sa pagprotekta sa mga walay pinuy-anan o kabus o kadtong gikonsiderar nga naa sa kategorya sa urban poor ubos sa Republic Act 7279.

“Kaning mga structures (demolished), commercial ni siya, unya naa lagi nagpuyo kay gipaabangan, mga tindahan, prutasan man na sa una, kan-anan na ‘ron, unya ang sud kay mga boarding houses...so dili ma covered sa RA 7279," siya miingon.

Si Librando niingon nga gihangyo sila sa korte sa pag-isyu og certification of non-coverage.

Ang maong mga  estraktura naa sa pribado nga lote ug gigamit kini isip commercial structures. Gipasabot sab niya nga tungod sa maong rason dili sila makatabang aron sila hatagan og relocation site base sa balaod.

Ang kabahin sa mga pangangkon nga extension ang maong lote sa kampo sa militar ug gi- expropriate, dili kini tuohan hangtud nga wala silay mapakitang titulo.

“Naay part sa kampo, naa say part nga dili, naa say part nga natitulohan og private persons, so kana siya (demolished area), natitulohan na’g private persons,” pagpasabot pang Librando.

Giklaro niya nga sa wala pa ang demolition, gipadad-an nang daan og notisya ang mga nag-okupar sa luna.--  IBM BANAT NEWS