CEBU, Philippines — Opisyal na nga gisugdan sa Department of Social Welfare and Development-7 ang ilang food redemption alang sa unang batch sa mga beneficiary sa Cebu ug Negros Oriental ubos sa Walang Walang Gutom 2027: Food Stamp Program.
Ang food redemption sa rehiyon gipahigayon sa mga partner retailer stores sa Lungsod sa Cordova nga adunay 159 ka beneficiaries ug sa Mabinay, Negros Oriental nga adunay 773 ka indibidwal nga mga beneficiary.
Si DSWD Assistant Secretary Krunima Antonio Escudero ll ug Regional Director Shalaine Marie Lucero maoy nitambong sa food redemption sa Barangay Cogon, Lungsod sa Cordova.
Sa pakigpulong ni Escudero, iyang gipahinumdoman ang mga beneficiary ug partner retailers sa pagsunod sa mga kondisyon o guidelines sa Food Stamp Program tungod kay ang duha ka partido makabenepisyo sa mga probisyon niini.
Matud ni Escudero nga nindot ang maong programa tungod kay kay dili lang ni dole out, kinahanglan usab nga adunay buhaton ang mga beneficiary aron padayon usab silang makadawat sa mga benepisyo.
Ug kini nagpamatuod nga nag-abot sila aron mapalambo ang serbisyo sa gobiyerno ug makaabot sa tanan.
Sa laing bahin, si Lucero nag-awhag kanila nga mogamit sa Electronic Benefit Transfer (EBT) cards.
Ang matag EBT card adunay PHP 3,000 nga food credits gikan sa DSWD-WGP aron mo redeem og food commodities nga adunay 50 porsyento (PHP1,500) nga gigahin sa carbohydrates, 30 porsyento (PHP 900) alang sa mga protina, ug 20 porsyento (PHP 600) alang sa mga prutas ug utanon.
Ang DSWD Field Office VIl nagsugod na sa pag-assess sa mga lokal nga retailer ingon man sa pagpahigayon sa onboarding nga mga kalihokan aron mapadali ang mga proseso sa akreditasyon ug aron masiguro ang igong gidaghanon sa mga retailer alang sa program scaling. (BANAT NEWS)