JobStart Philippines gilusad alang sa mga OSY
CEBU, Philippines — Gilusad sa Kagamhanan sa Dakbayan sa Sugbo niadtong Lunes, Hulyo 15, 2024 ang “JobStart Philippines Program” aron matabangan nga makatrabaho ang mga out-of-school youth (OSY) sa siyudad.
Si Acting Cebu City Mayor Raymond Alvin Garcia nagkanayon nga ang maong programa dili lang alang sa pag-abag nga makakita og trabaho ang mga OSY tumong usab niini nga makigbisog sila sa ilang kaugmaon.
“This program is not just about finding jobs, it’s about fighting your future, it’s about equipping with the necessary skills and opportunities, so that one will be able to forge their full path that leads to meaningful careers”, matud ni Garcia.
Ang maong programa nga ubos sa Department of Labor and Employment (DOLE) nagtumong sa paghatag og mga kahigayonan alang sa mga OSY nga nag-edad 18 hangtud 24-anyos nga high school ra ang nahuman o wala nakatungha og kolehiyo.
Pinaagi sa JobStart ang mga OSY maabagan sa pag-ila ug pagkab-ot sa ilang gitinguha nga trabaho, pagpausbaw sa ilang kahanas sa high-demand nga mga industriya, ug pag-angkon og trabaho sa pribadong sektor isip interns nga adunay sweldo nga gi-subsidize sa gobiyerno.
Subay niini, palambuon pa ang mga serbisyo alang sa mga kabatan-onan pinaagi sa Public Employment Service Office (PESO).
Dungan sa paglusad sa programa sa DMDP gipahigayon usab ang "employers engagement forum" nga gitambongan sa 16 ka kompaniya sa Dakbayan sa Sugbo lakip ang Crimson Resort and Spa sa Mactan, Escario Central Hotel, St. Mark Hotel, Golden Arches Development Corporation (McDonalds), Ney Shell Station, ug Cebu Golden Restaurant.
Ang maong kalihokan gitambongan nila ni Garcia, Konsehal Jaypee Labella, chairman sa Committee on Labor, Employment, Cooperative, and Livelihood sa konseho sa siyudad, Konsehal Joel Garganera, DOLE-7 Director Lilia Estellori ug Marites Mercado gikan sa DOLE-7 labor employment. —Gie-Ann N. Tapic/BDB BANAT NEWS
- Latest
