CEBU, Philippines — Dili mominos sa 36 ka panimalay ang naigo sa sunog nga niulbo sa Sitio Sudlon, Barangay Catarman, Lungsod sa Cordova, Domingo sa buntag.
Ang alarma sa sunog nadawat sa kabomberohan alas 9:25 sa buntag nga hingpit napawong alas 10:11 sa buntag. Dili mominos sa 22 ka mga balay ang naugdaw ug 14 ang nakan-an sa kalayo diin hangtud karon padayon pa nhimo og imbestigasyon ang kabomberohan kung kang kinsa nga panimalay nagsugod ang sunog, ang danyos lakip usab ang hinungdan niini.
Ang maong dapit naghuot ug sikit-sikit ang kabalayan ug duna na sab mga insidente sa sunog nga nahitabo sa maong dapit sa nanglaba nga katuigan.
Usa ka lalaki nga giingong nitabang sa pagpawong sa kalayo ang gitabang human natagakan kini sa wire ug nakuryentihan. Ang maong lalaki 35-anyos naa karon sa tambalanan.
Si Mayor Cesar Didoy Suan nibisita sa mga nasunogan aron paghatud og mga dinaliang hinabang apil na ang financial assistance sa matag pamilyang naapektahan.
Ang mayor niawhag usab sa buot nga mopaambit sa ilang tabang nga idiretso kini ngadto sa Catarman Barangay Hall o sa iyang buhatan.
Dili mominos kwarenta ka pamilya ang giingong apektado sa maong pag-ulbo sa sunog. (BANAT NEWS)