Laing drayber nasakpan

CEBU, Philippines — Laing taxi driver na sab ang nasakpang naningil og sobra sa pletihan ang giimbitar sa High Patrol Group (HPG)-7 human ilaha gyud kini nga nasakpan nga nagbuhat niini sa operatiba nga nagpakaaron-ingnong pasaherong delegado sa Palarong Pambansa 2024.

Ang maong 52-anyos nga taxi driver nga taga Barangay Ibo, dakbayan sa Lapu-Lapu 20 ka tuig na matod pa nga nagmaneho og taxi.

Matud ni Police Lieutenant Colonel Wilbert Parilla, Regional Chief sa HPG-7 nga mimando si Police Regional Office(PRO)-7 Director Brigadier General Anthony Aberin nila nga aksyunan ang mga reklamo labot sa giingong overcharging sa plete sa taxi sa mga pasahero nga delegado sa Palarong Pambansa 2024.

Hinungdan kagahapon sa buntag nagpahigayon sila og surveillance diin ilang mga intelligence operatives nisakay og taxi ug nagpakaaron ingnong delegado aron pagsuta kun tinood ba ang report.

Nakompirmar nila kini human usa sa ilang personnel nisakay og taxi gikan sa Pier 1 paingon sa Cebu City Sports Center(CCSC) ang gipangayoan og P200 ug dili gamiton ang metrohan. Kun ipaagi sa metro P75 ra  unta ang mabayran.

“Mao na nga duna man tay nagbantay, duna tay prearrange signal, ni-dial sa atong kauban so nag-atang na sad atoang mga personnel sa HPG headed by our deputy Lt. Col. Villarin and then sa atoang Metro Cebu Personnel, atoa siyang gi flagged down,” sigon ni Parilla.

Mohimo og report ang HPG-7 ug iduso nila kini sa Land Transportation Office(LTO)-7 ug Land Transportation Franchising and Regulatory Board(LTFRB)-7 bahin niini.

Wala gi-impound ang taxi ug wala sab gidakop ang driver apan dili kini maka drive sanglit gikompiskar man iyahang lisensiya.  “This is a clear warning sa mga taxi driver to include operators nga dili sila mag overprice considering we have already a lot of personnel not only HPG but the entire region seven per directed by our Regional Director,” ni Parilla pa.

Gihulagway  sa kapulisan ang ingon ani nga binuhatan makadaot sa imahe sa Central Visayas partikular na ang Cebu City nga maoy host sa Palarong Pambansa 2024.

 “Mga bai gamiton lang gyud nato ang meter kay ako nakuan ko sa akong pagpangayo…overpriced daw,” matud pa sa drayber nga gikuhaan og pamahayag sa Banat News.

Niadtong niaging adlaw, duha ka taxi drivers sab ang nasakpan sa LTO-7 nga nag-overcharging sa pasahero.--  IBM BANAT NEWS