CEBU, Philippines — Miabot sa 12 ka tindahan ug extensions sa panimay ang gipangguba sa mga sakop sa Anti-Vending Task Force diha mismo nagpatong sa kanal sa Sitio Rattan, Barangay Tanke, Dakbayan sa Talisay niadtong Huwebes sa hapon.
Si Edwin Nierves, pangu sa task force niingon nga gipatuman nila ang operasyon subay sa kamanduan sa Department of Interior and Local Government (DILG).
Mas nipatuman sab sila niini tungod kay ang mga estraktura naa na gyud kini nagbarog diha sa ibabaw sa mga kanal.
Matud pa ni Nierves nga daghan na ang reklamo gumikan sa pagsugwak sa tubig kanal tungod kay lisod limpyohan sa nakabara nga basura gumikan sa mga estraktura.
Nakita sab nila nga nakabalda sab sila sa karsada makaali sa mga emergency vehicle.
Sa wala pa gihimo ang clearing operation gitagaan og higayon ang mga apektadong pamilya nga sila na ang boluntaryo nga moguba niini.
Hinuon kung buot nila kuhaon ang materyales nga nakuha sa task force mahimo ra gyud kini kaayo pero isiguro nga di na kini ibalik sa pagtukod diha daplin sa karsada.
Dugang pa ni Nierves nga daghan pa sila nga lugar nga balikan aron sa pag guba sa estraktura nga nakababag sa karsada.
Sa pikas bahin, temporaryong sirhan ang Cebu South Coastal Road (CSCR) karong adlaw nga Domingo, Hulyo 14,2024 tungod sa ipahigayong Nutri Run nga magsugod alas 3 sa kaadlawon hangtud na sa alas 7 sa buntag.
Ang lumba magsugod sa sitio Kalmar hangtud kini sa Barangay Poblacion ug Dumlog. Ang sirhan mao ang lane paingon sa Syudad sa Sugbo samtang two-way lane ang sa south bound lane. Ang City of Talisay-Traffic Operation Development Authority (CT-TODA) niawhag sa motorista nga planuhon ang ilang biyahe nianang adlawa.— IBM BANAT NEWS