CEBU, Philippines — Ang Lungsod sa Carmen nipahigayon og public hearing alang sa plano ug pagpatuman sa P1.1 bilyones nga proyekto matud ni Mayor Carlo Villamor.
Gibutyag ni Villamor nga ang proyekto nga ugmaron mao ang Paseo Carmen diin anha kini tukoron sa 423, 117 nga luna sa lungsod diha sa mga barangay Cogon West ug Baring.
Nasayran nga ang Paseo Carmen susama kini sa Paseo Arcenas sa Barangay Banawa sa Siyudad sa Sugbo.
Ang maong mixed-use development aduna kini commercial, industrial, housing, institutional ug lifestyle nga gilaoman nga makahatag og dakong kalamboan sa lungsod.
“Dako kini nga proyekto, mo hatag kini og liboan ka trabaho ug oportunidad sa mga Carmenanon labi pa sa nasakopan nga Barangay Cogon West & Brangay Baring”, matud ni Villamor diha sa iyang Facebook page.
Ang maong public hearing gihimo aron pagdungog sa mga kwestiyon ug concerns sa mga residente sa lungsod hilabina sa mga maapektohan niini lakip na usab ang pagpasabot sa maong proyekto ngadto sa publiko. BDB BANAT NEWS