HVI gipasakaan na og kaso

CEBU, Philippines — Gipasakaan na og kasong kalapasan sa Section 5 ug 11, Article II sa Akta Republika 9165 kun “Comprehensive Dangerous Drugs Act of 2002” ang 53-anyos nga lalaki nga high value individual kinsa nasikop atol sa buy-bust operation sa Regional Police Drug Enforcement Unit sa Police Regional Office (PRO)-7 diha sa Sitio Kamagong, Barangay Lahug, Siyudad sa Sugbo sa niaging adlaw.

Ang suspetsado mao si alyas “Emo”, residente sa nahisgutang lugar.

Nasakmit gikan sa suspetsado ang 400 gramo nga shabu nga nikantidad tanan ngadto sa P2.7 milyones.

Nasayran nga ang suspetsado maka-dispose kini og 500 gramong shabu matag semana diin ang area of operations niini ang tibuok Dakbayan a Sugbo.

Sa laing bahin, laing HVI regional level ang nasikop usab atol sa buy-bust operation nga gipahigayon sa City Intelligence Unit/City Drug Enforcement Unit sa Dakbayan sa Mandaue diha sa Gaisano Road Zone 7, Barangay Mantuyong sa maong siyudad sa nilabay’ng adlaw.

Ang suspetsado mao si alyas “Christian”, 33-anyos, ulitawo, taga Dakbayan sa Lapu-Lapu.

Nasakmit gikan kaniya ang 25 gramos nga shabu nga nibalor ngadto sa P170 mil ug buy-bust money.

Samtang sa Dakbayan sa Lapu-Lapu nikabat ngadto sa P200,000 ang kantidad sa shabu nga nasakmit gikan sa 35  ka pusher nga nadakpan sa Lapu-Lpau City Police Office (LCPO) atol sa tulo ka adlaw nilang Simultaneous Anti-Criminality Law Enforcement Operation (SACLEO)  niadtong Hulyo 5  hangtud sa 8,  2024. —Romeo D. Marantal, Rowena D. Capistrano, Romeo T. Limpangog (BANAT NEWS)