CEBU, Philippines — Nabalhog sa Mabolo Police Station ang usa ka 52-anyos nga habal-habal driver human kini gipadakop kay giingong nagbinastos gawas sa usa ka mall sa Cebu Business Park, siyudad sa Sugbo pasado alas 12 sa udto niadtong Martes, Hulyo 9, 2024.
Ang suspetsado nga si alyas Ed, 52 anyos, residente sa Barangay Canduman, siyudad sa Mandaue samtang ang reklamante usa ka 59 anyos, nagpuyo sa Barangay Bacayan, siyudad sa Sugbo.
Sa report sa Mabolo Police Station ang reklamante nagpakitabang sa mga police nga naa sa police assistance desk sa mall kay wala makauyon nga gibalik-balik og sulti sa habal-habal nga "motor maam kay lami ang motor" kini bisan og nibalibad na ang reklamante.
Ang suspetsado sa iyang bahin mipasabot nga ang tumong sa iyang gisulti mao nga makita gyud sa reklamante nga nindot sakyan ang motor.
"Wala nako sila duola, nilabay rana sila niya karon niagi sila sa kilid niana ra gyud ko mas lami gyud ang motor kay makita ninyo ang view", sigon sa habal-habal driver.
Samtang si Police Lieutenant Colonel Janette Rafter, Deputy City Director sa Cebu City Police Office(CCPO) mipasabot nga dunay balaod nga gitawag og Safe Spaces Act.
Kun wala makaila sa tawo unya dili close magmatngon gyud sa ipanulti.
"Let us be reminded kanang mga ingon ana karon dili na gyud na basta-basta nga ihatag nato nga comments", ni Lt. Col. Rafter pa.
Nasayran sa miaging mga semana duna say nadakpan ang Abellana Police Station 2 gumikan kay nagbinastos og duha ka mga babaye nga namaligya og sud-an. (BANAT NEWS)