CEBU, Philippines — Unom ka patay’ng lawas sa mga naanod sa baha ang na-recover kagahapon sa gabii diin usa na lang kanila ang padayong gipangita sa oras sa pagsuwat niining balita.
Kini ang gibutyag ni Camen Mayor Carlo Villamor sa post niini sa iyang Facebook page.
Ang mga na-recover mao sila si Arshen Bejoc, 11-anyos; Aishie Hermoso, 12-anyos; Rhesamie Ypil Costan, 26; Elmer Costan, 25; Clarisse Ypil, 13; ug Nathaniel Lozano, 12 samtang padayong gipangita kagahapon sa mga rescuer si Mike Stanly Tungal, 15-anyos.
Ang pamilya sa mga biktima nagpahigayon kini og family outing sa Lungsod sa Carmen diha usa ka sakyanan nga adunay 17 ka tawo ang karga ang naanod sa baha niadtong Lunes. Ang mga naluwas mao sila si Jogelyn Tungal, 39; Jasmin Gica, 37; Debbie Hermoso, 40; Ranillo Hermoso, 44, drayber sa sakyanan ug unom ka menor de edad.
Base sa taho sa Carmen Police Station nga ang pula nga Toyota pick-up nadala sa kusog nga bul-og sa tubig gikan sa niawas nga sapa sa Sitio Mangitngit, Barangay Lower Natimao-an, Lungsod sa Carmen.
Ang maong sakyanan natanggong kini ug naanod dihang niagi sa spill way tungod sa kakusog sa bul-og sa tubig.
Gikataho nga ang mga biktima gikan sa usa ka party sa maong sitio ug padulong na unta nga mopauli.
Si Villamor nibutyag nga adunay mga diver ang nitabang sa pagpangit sa mga biktima sa kadagatan usab sa lungsod.
Samtang sa Lungsod sa Liloan, 11 ka balay ang nangaguba ug pipila usab ang nakaangkon og kadaot human naagian og alimpus.
Base sa post sa Facebook page sa LGU sa lungsod nga ang Purok Greenhills ug Nangka sa Barangay Poblacion ang napektohan.
Sa Lungsod sa Sibonga, usa ka dakong bato ang nahulog diha sa dalan sa Sitio Happy Valle sa Barangay Candaguit niadtong Lunes sa gabii hinungdan nga temporaryong gisirado ang maong dalan.
Kagahapon ang Municipal Disaster Risk Reduction Management Office sa lungsod nipahibalo nga maagian na ang maong dalan apan niabiso ang opisyales sa mga motorista nga magbantay samtang nagbiyahe diha sa lugar.
Sa Lungsod sa Minglanilla, upat ka balay ang naapektohan human nidahili ang yuta sa Purok Pamelo Barangay Linao.
Sa Dakbayan sa Talisay, duha ka hugna sa pagbaha ang girespondehan sa Talisay City Task Force Flood Control atol sa pagbunok sa uwan niadtong Lunes sa hapon.
Unang pagbaha nasinati alas 4:00 sa hapon diin nilanat kini og 40 minutos diha sa Barangay Tabunok.
Si Edwin Nierves, pangulo sa flood control task force nibutyag nga sa unang pagbaha niabot sa taga tuhod ang giladmnon sa tubig ug pipila ka mga sakyanan ang napagngan.
Ang ikaduhang pagbaha nahitabo mga alas 7:00 sa gabii diha gihapon sa maong lugar. (Le Phyllis F. Antojado, Rowena D. Capistrano ug Gabriel C.Bonjoc/BDB) BANAT NEWS