CEBU, Philippines — Mabulokon ang pagbukas sa Palarong Pambansa 2024 nga gisugdan sa usa ka parada nga nanukad sa Fuente Osmeña paingon sa Cebu City Sports Center.
Ang matag rehiyon adunay mga nag-una nga dancers nga gikan sa mga nagkadaiyang tunghaan ug grupo sa Sugbo.
Ang parade gipangulohan ni Acting Cebu City Mayor Raymond Alvin Garcia uban sa opisyales sa siyudad ug sa mga national ug local technical working group ug coaches. Samtang nagpaabot kagahapon sa dagkong opisyales nga motambong sa kalihokan sama nila ni Presidente Ferdinand "Bongbong" Marcos, Jr ug Bise Presidente Sara Duterte gilingaw usa ang mga delegado sa mga awit gikan sa Sinulog winners.
Sa wala pa magsugod ang kalihokan mga alas 2:00 sa hapon niabot si Senador Imee Marcos kinsa nisuporta sa Ilocos Region.
Si Presidente Marcos giubanan nila ni Gobernador Garcia ug Acting Cebu City Mayor Garcia samtang si Duterte ang wala nipatim-aw sa pagbukas sa Palaro diin gilaoman kining mohatag og mensahe isip kalihim sa Department of Education.
Si Presidente Marcos niawhag sa mga atleta nga padayon sa ilang passion ug gugma sa paugnat sa kusog ilabi na nga sila ang magdala og dungog sa nasud.
Nunot niini, full alert status ang Police Regional Office -7 subay sa nahisgutang dakong kalihokan sa paugnat sa kusog.
Niadtong Hulyo 8, 2024, na-monitor sa PRO-7 ang 14,300 delagates sa Palarong Pambansa nga naa karon gipahimutang sa billeting areas sa Siyudad sa Sugbo.
Samtang 919 ka delegado sa National Festival of Talents ang gipahiluna sa Siyudad sa Naga, Lungsod sa Minglanilla ug San Fernando; 2,829 delegates sa National School Press Conference nga naa sa Tuyom Elementary School sa Dakbayan sa Carcar; 283 delegates alang sa Learners Convergence ang anaa sa billeting areas sa Dakbayan sa Lapu-Lapu. Si PRO-7 Director Anthony Aberin uban ang command group, regional staff ug city director sa Cebu City Police Office(CCPO) ang nibisita ug nihimo og simultaneous inspection sa nagkalain-laing venues sa duwa ilabi na sa billeting areas sa mga delagado aron masiguro nga dunay igong polis nga gipakatap nga mobantay sa ilang seguridad. Ang PRO-7 security template nihimo og adjustment subay sa pagtambong nila ni Presidente Marcos ug Duterte lakip sa ubang dagkong opisyales. BDB BANAT NEWS