CEBU, Philippines — Moabot sa 921 ka tinun-an sa Talisay City College (TCC) ang mogradwar ug himoon ang ilang graduation ceremony karong Hulyo 12, ning tuiga.
Si Talisay City mayor Gerald Anthony “Samsam” Gullas nipahibawo nga nagtigom sila sa board of trustees niadtong milabay nga adlaw.
Lakip nila nga gihisgutan mao ang pagpaso ug pagdawat sa diploma sa mga tinun-an sa school year 2023-2024.
Nalipay si Gullas tungod kay ubay-ubay na gyud ang nakagraduate sa TCC nga wala silay gibayaran nga tuition fees.
Si Dr. Richel Bacaltos, presidenti sa TCC nibutyag nga diha sa dakong mall sa South Road Properties (SRP) nila ipahigayon ang graduation.
Sa 921 ka graduates, 165 sa kursong Bachelor of Elementary Education, 284 sa Bachelor of Secondary Education, 250 sa Bachelor of Science in Hospitality Management ug 223 sa Bachelor of Science in Industrial Technology. MEL BANAT NEWS