CEBU, Philippines — Dul-an sa P18 milyones ang balor sa ilegal nga drugas nga nasakmit sa Police Regional Office (PRO)-7 atol sa ilang Simultaneous Anti Criminality Law Enforcement Operation (SACLEO) gikan sa Hulyo 5 hangtud sa 7, 2024.
Niabot sa 2,625.31 gramos nga shabu ang nakompiska sa kapolisan ug 174 ka tawo ang nadakpan.
Samtang sa illegal gambling operation nakapahigayon sila og 121 ka operasyon diin 213 ka tawo ang sikop ug kapin sa P21, 000 nga bet money ang nasakmit.
Kabahin sa loose firearms, 104 ka operasyon ang ilang napahigayon diin 101 ka armas ang nasakmit ug gi-surrender, 12 ka tawo ang sikop ug tulo usab ka explosives ang nasakmit.
Sa wanted persons, niabot sa 128 ang nadakpan diin 11 niini most wanted person ug 117 ang other wanted person.
Sa laing bahin, duha ka pusher gikan sa Barangay Pardo, Siyudad sa Sugbo ang nadakpan sa gipahigayon nga buy-bust operation sa Presinto 5 sa Lapu-Lapu City Police Office (LCPO) niadtong Domingo sa tungang gabii diha sa Barangay Pusok, Siyudad sa Lapu-Lapu.
Si Police Major Ramil Dugan, hepe sa Presinto 5 sa LCPO nagkanayon nga ang duha pulos 26-anyos ug molupyo sa Barangay Pardo, Siyudad sa Sugbo.
Nasakmit sa kapolisan gikan sa mga suspetsado ang upat ka gramong shabu nga nikantidad ngadto sa P27,000.
Ang mga suspetsado nagtingkagol karon holding facility sa LCPO ug mag-atubang og kasong kalapasan sa Akta Republika 9165 kun “Comprehensive Dangerous Drug Act of 2002”. (BANAT NEWS)