Abilihan naman gyud ang Palarong Pambansa 2024 diin ang dakbayan sa Sugbo gyud ang palarang dapit sa nasud nga maoy mo-host sa kinadak-ang tigi sa paugnat sa kusog sa Pilipinas.
Ug ang tanan excited na unsay mamahimong gama niining panahona ilabi kay ang duha ka mga dagkong opisyal sa nasod ang kompirmado na nga motabong, si Presidente Ferdinand Bongbong Marcos Jr. ug Bise Presidente Sara Duterte.
Samtang sa lokal nga lebel, syempre si Cebu City Acting Mayor Raymond Alvin Garcia uban ang mga sakop sa konseho sa dakbayan ug motambong usab si suspended Mayor Mike Rama kay mora’g giimbitar man seguro, kong nadayon ba nga padad-an og imbitasyon. Hinuon personal man siya nga giimbitar ni Acting Vice Mayor Dondon Hontiveros isip personal niya nga guest busa makatambong gyud seguro.
Ang Cebu Province, ilaum ni Gobernador Gwendolyn Garcia, nihatag usab og eight million pesos isip abag sa dakbayan nga gihangop ug gipasalamatan ni Acting Mayor Garcia. Haum lang pud nga dapiton niini ang iyang iyaan nga motambong sa pagbukas sa Palarong Pambansa.
Kong ingon niini ang scenario mas mosamot ka kulba-hinam ang mga eksina kay sa national level pa lang magkaabot gyud ang kanhi mag-partner nga BBM-SARA. Wala untay issue kong wala pa mokalas si VP Sara sa poder sa Marcos administration dihang mi-resign siya sa gabinete isip kalihim sa Department of Education. Sukad sa pagsumiter niya sa resignation murag karon pa sila subling magkaabot kong magdungan gyud sila sa opening ceremony.
Wala man seguroy issue kay bisan og mibiya sa administrasyong Marcos managhigala pa man seguro ang duha, gawas lang sa first lady nga klaro ug harap harapan ang kaligotgot niini sa mga Duterte. Pero dili gyud malikayan nga mapunting ang mga mata sa katawhan niining duha ka lider sa nasod nga mag uban atol niining panahona.
Sa local scenario, samot na kay wala malilong ang bikil ni suspended Mayor Rama ug ni Governor Gwen Garcia ug klaro usab kaayo karon nga nabikil si Rama sa gipatuman nga policy sa dakbayan sa Sugbo ni Acting Vice Mayor Garcia. Busa mas kulba hinam kini nga maoy giatangan karon sa mga Sugboanon.
Sa giingon pa sa usa ka opisyal sa DepEd mao na kini ang pinaka awkward moment o kiwaw kaayo nga panahon alang kanila. Apan alang kanila dili maapektohan ang kalihokan sa bisan unsa man nga isyu personal sa mga opisyal nga motambong sa Palarong Pambansa 2024.
Hinuon nagkasumpaki man ang ilang mga dalan karon apan silang tanan nanawagan man og kahiusahan busa mao nalang kini ang atong tuohan ug atangan alang sa kalamposan sa kalihokan nga gikahinaman sa tanan.