CEBU, Philippines — Natunol na mismo ni acting Cebu City mayor Raymond Alvin Garcia ang Financial Assistance ngadto sa Local Government Unit sa Canlaon uban sa pipila ka mga konsehal sa siyudad niadtong adlaw nga Biyernes.
Ang gitunol nga hinabang sa mga opisyal sa dakbayan nagkantidad og P2milyones nga giaprobahan usab sa konseho sa dakbayan sa Sugbo.
“Atong gitunol gahapon, July 5, 2024, ang atong assistance alang sa LGU sa Canlaon, accompanied by several members of the Sangguniang Panlungsod, which approved the allocation of P2 million,” suma ni Garcia sa iyang post.
Matud pa ni Garcia nga dili man dako kaayo ang ilang natunol nga hinabang komparar sa katalagman nga nasinati sa katawhan pero sayod ang mga opisyal sa siyudad sa Canlaon nga kinasingkasing ang ilang pagtunol sa ayuda.
Si Canlaon City Vice mayor Diego E. Santiago ug city councilor Marianne Angelee A. Soliva uban sa mga department heads ug barangay captains sa siyudad ang midawat sa tseke.
Nagpasalamat usab si Councilor Soliva in behalf sa LGU sa Canlaon kang acting mayor Garcia tungod sa maong hinabang sa siyudad sa Sugbo.
Gipahibawo usab ni Garcia nga didto sa Negros Island nagpabilin nga Alert Level II tungod sa padayon nga kalihukan sa Bulkang Kanlaon. (BANAT NEWS)