CEBU, Philippines — Hugot nga seguridad ang ipatuman sa Cebu City Police Office sa pagsulod sa mga tawo sa Cebu City Sports Center kun asa ipahigayon ang opisyal nga pagbukas sa Palarong Pambansa 2024 nga mahitabo karong Martes, Hulyo 9, 2024.
Kini tungod kay motambong sa kalihukan sila si Presidente Ferdinand Marcos Jr., ug Vice President Sara Duterte. Matud pa ni Police Lieutenant Colonel Janette Rafter, Deputy City Director for Administration sa Cebu City Police Office nga susihon gyud og maayo ang gamit sa mga tawo nga manan-aw isip kabahin sa ilahang security measures. Mag-andam sab og Civil Disturbance Management(CDM) ang kapulisan sanglit wala nila gisalikway ang posibilidad nga dunay mga progresibong grupo nga mohimo og lihok-protesta.
Kadaghanan sa mga delegado sa Palarong Pambansa 2024 niabot na sa Sugbo ug gipahiluna na
sa 20 ka mga tunghaan sa siyudad sa Sugbo nga gigamit isip billeting areas sa mga contingents gikan sa nagkalain-laing rehiyon sa Pilipinas.
Si Police Regional Office (PRO)-7 pinangulohan ni Regional Director Brigadier General Anthon Aberin nisusi sa mga billeting areas ingon man sa Cebu City Sports Center aron pagsigurong naandam na ang tanan sa aspeto sa seguridad sa Palarong Pambansa 2024. – IBM BANAT NEWS