CEBU, Philippines — Patay na nga nadangat sa tambalanan ang pahinante sa wing van samtang angol ang driver niini human sila nadisgrasya sa Barangay Yupisan, Lungsod sa Pamplona, Probinsya sa Negros Oriental pasado alas 6 sa buntag kagahapon.
Ang pahinante ug driver parehong residente sa Barangay Culipapa, Lungsod sa Hinoba-an, Probinsya sa Negros Occidental.
Sigon ni Police Master Sergeant Rengie Fernandez, imbestigador sa Pamplona Police Station, gikan sila sa Lungsod Hinoba-an.
Apan pag-abot nila sa dulhugon nga bahin sa Barangay Yupisan, Lungsod sa Pamplona giingong nawad-an sila og brakes ug nahulog sila sa pangpang. Nasayran ang wing van nagkarga og bloke sa mga ice nga ihatod unta nila sa Lungsod sa Manjuyod.
"Ang destination nila sumala sa driver adto ni sila sa Manjuyod town.. Niagi lang diri sa Pamplona, gikan sa og Hinoba-an," sigon ni Police Master Sergeant Fernandez.
Gikataho nga atol sa pagkahagbong, nalagpot paggawas sa trak ang namatay maong nagrabihan kini ug nakabsan sa kinabuhi.
"Evacuate unta ang pahinante niya tungod sa serious injury nga naangkon wala na dayon kaagwanta," ni Fernandez pa. — /IBM (BANAT NEWS)