Ceres bus kalit misilaob

CEBU, Philippines — Nasunog ang usa ka Ceres Bus nga gipanagiya sa Vallacar Transit pasado alas 11 sa buntag sa adlaw’ng Lunes diha sa National Highway, Canamucan II, Barangay Canamucan, Lungsod sa Compostela.

Ang driver sa bus mao si Michael Orque, 36 anyos, residente sa Barangay Campusong, Lungsod sa Borbon.  Si Orque ug gibanabanang 20 niini ka mga pasahero luwas ra hinuon nga nakagawas sa maong bus.

Sa report sa Compostela Police Station gibutyag sa driver sa bus nga samtang padulong sila sa norte nakapanimaho siya og sunog ug sunod niyang nakita nga miaso ang dash board panel sa bus.

Gumikan kay napanimaho naman og sunog gipadaplin sa driver ang gimamehong bus, giablihan ang pultahan ug gipakanaog ang iyang mga pasahero ug ang konduktor. Gikuha dayon unta niini ang fire extinguisher ug gipasiritan ang dashboard apan kalit lang matod pa nga niulbo ang kusog nga kalayo.

Dihang naabot ang kabomberohan sa Lungsod sa Compostela naugdaw na ang bus. Gisusi pa sa kabomberohan ang hinungdan sa sunog. (BANAT NEWS)