Libreng internet mapahimuslan sa mga molupyo sa siyudad sa Mandaue

CEBU, Philippines — Makabaton na unya ang mga molopyo sa kabarangayan sa siyudad sa Mandaue og libreng internet connection nunot usab sa panag-alayon sa kagamhanan sa maong dakbayan ug Synetcom Philippines Inc.

Ang kagamhanan sa dakbayan sa Mandaue nipirma og Memorandum og Understanding MOU tali sa Synetcom Philippines Inc. aron mao kini ang mohatag og libreng internet connection sa siyudad.

Si Mandaue City mayor Jonas Cortes naningkamot sa pag level-up sa kalambuan sa matag Mandauehanon isip ICT-Ready.

Segun sa tahu sa information team sa Mandaue City government lakip sa gipaabot mao ang paglusad sa siyudad sa Mandaue sa Move Mandaue App.

Ang Move Mandaue App maoy magsilbing connection sa mga Mandauehanon sa sayun nga access sa serbisyo sa katawhan nga adunay link sa mga buhatan sa gobyerno aron dali maka connect sa ilang mga panginahanglan.

Makita sa maong app ang mga serbisyo nga ipaambit sa gobyerno ug maghatag og kasayon sa Mandauehanon sa pagpahimulos niini.

Si mayor Jonas Cortes sa iyang bahin miingon nga sa pag-adopt sa high technology pinaagi sa libreng internet connection iyang napanglantawan ang pag-asenso sa ekonomiya ug kalidad sa kinabuhi sa matag Mandauehanon. — /MEL (BANAT NEWS)