CEBU, Philippines — Naghimo na usab karon og mga pagpangandam ang kapolisan sa Mandaue City Police Office (MCPO) niining panahon sa ting-uwan pinaagi sa pag-imbentaryo sa ilang mga kahimanan.
Si Police Colonel Julius Sagandoy, director sa MCPO maoy nangulo sa gihimo nga imbentaryo diin naglakip kini sa ilang mga ekipo alang sa search and rescue nga ilang kinahanglanon sa higayon nga masinati ang massive flooding ug uban pa nga masinating katalagman.
Sa kasamtangan maoy gibatonan karon sa MCPO ang mga kahimanan nga naglakip sa life jackets, spine board, helmets, goggles ug pisi nga magamit sa rescue operation.
Nasayran nga ang PAGASA nideklarar na og rainy season sugod sa unang semana sa Hunyo 2024.
Si Police Lieutenant Colonel Mercy Villaro, tigpamaba sa MCPO nagkanayon nga nag-unang pagahimuon mao ang koordinasyon sa uban nga mga buhatan sa kagamhanan sa mga higayon nga masinati ang katalagman.
Naglakip niini ang City Disaster Risk Reducton and Management Office sa Bureau of Fire Protection ug uban pa. — BDB BANAT NEWS