Mga jelly fish nidas-ag sa kadagatan sa Santa Fe

CEBU, Philippines — Subling nipahimangno ang lokal nga kagamahanan sa Lungsod sa Santa Fe sa mga residente hilabina sa mga turista nga moanha sa lugar nga magbantay sa  jelly fish diin nagkadaghan kini karon diha sa kadagatan sa lungsod.

“Ang Lokal nga kagamhanan sa Lungsod sa Santa Fe nagpahimangno nga kanunay’ng magmabinantayon tungod aning nagkadaghang jellyfish hilabi na ang box jelly fish nga makamatay kong ugaling dili dayon kini madali kong ikaw mataptan niini, maong giawhag ang tanang Santafehanon ug ang atong mga pinalanggang turista nga  magmabinantayon kanunay”, tipik sa public advisory sa lungsod nga gi-post diha sa ilang Facebook page.

Matud sa LGU nga dili hinuon tanang jellyfish ang makamatay apan ang mga makagunit o mapilitan niini posibleng makasinati og “discomfort” ug allergic reaction.

Gipasabot sa LGU nga natural kini nga phenomenon sa ilang lungsod hilabina sa bulan sa Hunyo hangtud Septiyembre hinungdan nga angay masayod ang katawhan sa mga potensiyal nga risgo niini.

Matud usab sa lokal nga kagamhanan sa Lungsod sa Santa Fe nga kon ugaling makasugat o mopitlan og jelly fish mamahimong gamiton ang tubig sa dagat sa paghugas sa injury o samad, i-monitor ang kondisyon sa biktima ug kon mamahimo dad-on kini sa tambalanan.

“Remove victim’s clothing; Rinse affected area with vinegar as soon as possible for 30 seconds. Pain should be treated with hot water immersion (as tolerated) when possible”, laing tipik sa post sa LGU.

Nasayran nga niadtong buwan sa Hulyo sa niaging tuig usa ka 32-anyos nga babaye gikan sa Bohol ang namatay human napilitan sa box jelly fish sa Lungsod sa Santa Fe. — BDB BANAT NEWS