CEBU, Philippines — Aron mapugngan ang mga krimen nga binuhatan sa riding-in-tandem si PNP Chief General Rommel Marbil mipagawas og kamanduan sa tanang police offices sa nasud nga ipakatap sa kadalanan ang ilang mga polis.
Gani gusto sa PNP Chief nga apil sa ipakatap ang mga polis nga naa nadestino sa Holding Admin Units aron magamit usab sa pagsumpo sa kriminalidad.
Hinoon, dinhi sa siyudad sa Sugbo bisan og wala pa ang maong kamanduan apan ang Cebu City Police Office (CCPO) gihimo na nila ang pagpakatap og mga police sa kadalanan.
Matud ni Police Lieutenant Colonel Janette Rafter, Deputy City Director for Administration sa Cebu City Police Office nga mas palambuon nila kini aron mapakgang ang dautang plano sa mga kriminal ug dili mabalda ang hapsay ug kalinaw sa siyudad sa Sugbo.
“Tanan natong CMFC personnel as far as I know sa instruction sa atong City Director gi-deploy nato na kay wala man kaayo tay problema when it comes to insurgency so atong gibalhin og urban patrollers, amo na gitawag karon og Central Beat Patrol kay amo man gud ni gi-divide ang Cebu City, North ug South ug Central and base sa atong crime mapping ang most ocurences sa crime is at the Central area of Cebu City mao na atong gitawag og Central beat patrollers,” sigon ni Rafter.
Nasuta sab kadtong mga mga polis nga naa sa opisina nadestino isip admin officers mo-duty sab og duha ka oras nga beat patrol sa dili pa sila mo-report sa ilang buhatan.
Gumikan sa pagpakatap og daghang polis sa kadalanan nikunhod ang krimen sa siyudad ilabi na kining mga crime against property ug uban pa. (BANAT NEWS)