CEBU, Philippines — Ang University of San Jose Recoletos adunay duha ka mga topnotchers sa May 2024 Licensure Examination for Certified Public Accountants.
Ang nahimutang sa Top 6 mao si Mae Pearl Secuya sa rating nga 89.83 percent samtang ang Top 9 mao si Clark Peter Castillo nga nakakuha og 89.33 percent. Sila kauban ang laing 41 nga nakapasar sa exam sa nahisgutang tunghaan.
Ang USJR dunay 62.32% passing rate sa examination, nga kanunay nga sobra sa national passing percentage nga 30.28%.
Sa 10,421 examinees, 3,155 examinees o 30.28 percent ang nipasar sa examinations lukop nasud.
Ang resulta gipagawas sa Professional Regulation Commission (PRC) niadtong June 1, 2024. Atol sa press conference kagahapon gipadayag sa duha nga bisan og pareho sila nga top sa ilang klase nakasinate gihapon sila og pressure nga mo top sa examination.
Gumikan sa kanunay nga pag-ampo, commitment, dedication ug hardwork, nilampos sila dili lang sa pagpasar sa exam kundili nakuha nila nga masulod sa top ten.
“Struggles gyud mentally kay top mi sa among batch. Grabe ang pressure but nikalma rako pag exams na. Makaya ba ni nako? But nonetheless, gikaya nako whatever the results,” suma ni Secuya, kinsa taga Mantalongon, Barili, Cebu. Ang mga topnotchers, pulos nigradwar nga Magna Cum Laude ug suma pa nila nga mas taas ang pressure kanila tungod kay sa miaging tuig nga examinations nakuha sa USJR ang first placer nga mao si Hebban Tawantawan, usa usab ka magna cum laude.
Si Castillo, miangkon nga usa siya ka introvert ug mas mipili nga magpuyo sa balay og magduwa og computer games inay nga molaag sa gawas.
“I have no lovelife. I am also an introvert. Unya wala pud mi budget para laag. So, kung walay lingaw nag study na lang. suma ni Castillo.
Gipahibawo usab ni Dean Dr. Edgar Detoya, USJR School of Business and Management atol sa press conference nga sila si Secuya ug Castillo makadawat og P375,000 ug P300,000, respectively ug usa ka brand new laptop isip ilang premyo.
Si Dr. Rolando Martinez, chairman sa USJR Accountancy and Finance Department nalipay sa maong kalamposan sa duha nila ka tinun-an. Iyang gihinumdum niadtong tuig 1959, ang USJR nga kaniadto CSJR mao ang unang tunghaan nga nakaproduce og CPA board topnotcher ug first placer gawas sa Manila ug daku kaayo nila kini nga garbo. (BANAT NEWS)