CEBU, Philippines — Duha ka tawo ang naangol human nalimbuwad ang usa ka van nga adunay karga og libro diha sa Cebu South Coastal Road (CSCR) habig sa Barangay Canso-jong, Dakbayan sa Talisay kagahapon sa buntag.
Si Jonathan Tumulak, pangu sa City of Talisay-Traffic Operation Develop-ment Authority (CT-TODA) nagkanayon nga paingon sa habagatan ang van nga adunay karga nga libro.
Ang drayber nisaysay kaniya nga samtang sila nagdagan kalit lang nga na-wad-an siya og kontrol sa manobela hinungdan sa ilang pagkalimbuwad.
Duha sa upat ka mga truckboy ang nakahiagom og gamay nga pangos sa kalawasan. Matud pa ni Tumulak nga ang drayber niangkon nga adunay deperensya sa sakyanan hinungdan nga nahitabo ang disgrasya. Nakamugna man og pagkabara sa trapiko apan dali rasab kini nga nahawan. (BANAT NEWS)