Chan mohatag og ganti sa makatahu sa illegal nga panagat

CEBU, Philippines — Andam nga mohatag og ganti si Lapu-Lapu City Mayor Junard "Ahong" Chan niadtong mga tawo nga makataho ngadto sa iyang buhatan labot sa mga nagpasiugda og ilegal nga pagpanagat ilabi na niadtong migamit og dinamita aron masikop sa mga otoridad.

Matud pa ni Mayor Chan nga P20,000.00 ang iyang ihatag nga ganti alang sa makapadangat og taho labot niini.

Gipahibalo kini niya ngadto sa mga molopyo sa Barangay Punta Ingano sa tinguha nga kapanalipdan ang mga gasa sa kadagatan nga makadani usab sa mga mobisita nga mga turista.

Una na niini si mayor Chan mipakita sa iyang facebook page sa upat ka mga biktima sa illegal nga pamaagi sa pagpanagat nga migamit og dinamita nga naputlan og kamot.

Iyang gipanawagan nga unta maundang na ang maong matang sa panagat aron ka protihian ang mga marine life nga makadani usab sa pagtan-aw sa mga turista sa maong lugar.

Apil na niini ang minilyon nga sardines nga mga isda, corals, pawikan, dolphine ug butanding.

“Di ta gusto nga mawala kining mga gasa sa kinaiyahan kung magpadayon sila sa ilang illegal nga binuhatan. Bahala manghatag ko og reward para sa mga makasakop og mag-dynamite fishing basta mahunong lang ni. Ing-ana ka seryoso ang atong kampanya batok sa illegal nga binuhatan nga makadaot sa atong kinaiyahan”. Tipik sa facebook post ni mayor Chan.

Sa nasayran tungod sa mga gikataho nga ilegal nga pagpanagat gamit ang dinamita sa kadagatan sa dakbayan gihimo karon sa kagamhanan ang higpit nga pagbantay niini. (BANAT NEWS)